iCHAT me mbështetjen e Ministrisë së Zhvillimit Ekonomik më datë 04.02.2020 kanë mbajtur Tryezën: “Promovimi i sektorit minerar dhe rëndësisë së edukimit të të rinjve për zhvillimin ekonomik” në Universitetin e Mitrovicës “Isa Boletini” përkatësisht në Fakultetin e Gjeoshkencave.
Qëllimi i këtij projekti është promovimi i vlerave minerare të Kosovës dhe edukimi i të rinjëve për rëndësinë dhe rolin e këtij sektori në zhvillimin ekonomik të vendit.
Ky projekt pritet të ndikoj në rritjen e njohurive të të rinjëve mbi vlerat e mineraleve në Kosovë. Informimi i të rinjëve rreth vendburimeve të boksiteve. Njohja me rëndësinë e sektorit minerar dhe si ky sektor ndikon në zhvillimin ekonomik të vendit.
Rezervat minerare në Kosovë janë të mëdha, prandaj investimet duhet të orientohen në këtë sektor, duke pasur parasysh edhe kualifikimin e kuadrove. Kështu u tha të martën në tryezën me titull “Promovimi i sektorit minerar dhe rëndësisë së edukimit të të rinjve për zhvillimin ekonomik”, që u mbajt në Universitetin e Mitrovicës “Isa Boletini” (UMIB).
Në tryezën u paraqiten me prezantime studentët e FGJ-së. Ata potencuan rëndësinë e investimeve në sektorin minerar, duke pasur parasysh mundësitë e mëdha që ofrohen për zhvillim ekonomik si dhe për punësimin e të rinjve.
Dekani i FGJ-së, Naser Peci, tha se organizimi i kësaj tryeze është një mundësi shumë e mirë për studentët që të prezantojnë punimet e tyre në fushën minerare. “Resurset e mëdha minerare që ka Kosova, paraqesin mundësi të mëdha zhvillimi, mirëpo fillimisht kërkohet një qasje shkencore në shfrytëzimin e tyre”, tha ai.
Në tryezë morën pjesë edhe përfaqësues nga Ministria e Zhvillimit Ekonomik, përfaqësues nga Komisioni për miniera dhe Minerale, student dhe nxënës të SHMU “Bahri Haxha” – Vushtrri .
